БЕСЛАН.РУ

ÆРКÆСИНАГ ФАРСТА
Адæймаг фæззæджы йæ бæркæдтæ куы бафснайы, уæд фенхъæлмæ кæсы Ног азы æрцыдмæ, уæдæ нын амæндтæ, фарн æмæ æнæниздзинад æрхæсса, зæгъгæ. Фæлæ рæмудзæн æрмæджытæ чи уæй кæны сывæллæттæн, уый та цин фæкæны — мæ « товар» ныссатар кæндзынæн, зæгъгæ. Сывæллон йæ цæстытæ скъахдзæн кæнæ йе 'мгæрттæн исты фыдбылыз сараздзæн, ууыл æппындæр нæ асагъæс кæны.

Сабаты Коминтернæйы уынджы фæцæуын æмæ æртæ скъоладзауы, цыппæрæм къласмæ чи цæуы, ахæм сабитæ, кæрæдзиуыл æхсын райдыдтой петардæтæ. Бæстæ гæрæхтæ ссис. Мæхи нымæр загъд кæнын чи сын сæ рауæй кодта, уыйимæ, сывæллæттæ исты фыдбылыз куы скæной, ууыл цæуылнæ ахъуыды кодта, зæгъгæ. Уæдæ цымæ на пъæлицæйы кусджытæ дæр уыцы гæрæхтæ нæ хъусынц, куыннæ бафхæрынц уæйгæнджыты.

Ног азы æхсæв фидауы фæндыры цагъдæй, зард æмæ кафтæй, иунæг Стыр Хуыцаумæ æртæ чъирийæ скувынæй æмæ дзы курын сабырдзинад, амонд, æнæниздзинад. Фæлæ бæстæ гуыпп-гæрах скæн, уæд нын цавæр Хуыцау æмæ зæдтæ ракæндзысты арфæтæ? Иу адæймаг ницы бакæндзæн сæ аиуварс кæнынæн, фæлæ ахуыргæнджытæ, ныййарджытæ æмæ пъæлицæйы кусджытæ æмхуызонæй куы кусой, уæд нæ сабитæ фыдбылызæй хъахъхъæд уыдзысты.

Мæ цæст уын уарзы, нæ ирон адæм, районы газеткæсджытæ, цæмæй уын Ног аз ног хæрзтæ æрхæсса, æнæниздзинад, æнæмаст, æнæфыдбылыз цард. Уæ кæстæрты хорздзинад уынут кæддæриддæр!

"Жизнь Правобережья"