БЕСЛАН.РУ

Районы библиотекæйы кусджытæ цы мидисджын мадзал бацæттæ кодтой æмæ знон равдыстой æхсæзæм скъола æмæ æстæм профессионалон училищейы ахуырдзаутæн, уый, кæй зæгъын æй хъæуы, нæ кадджын бæрæгбоны фæдыл арæзт æрцыд. Амыдта йæ Къубалты Зинæ, районы Ныхасы бæрнон кусæг. Изæр райдыдта Лæгты Дзуары зарæгæй.
Бæрæгбонмæ æрбахуыдтой кадджын уазджытæ – Рахизфарсы районы Ныхасы уæнг Мæрзаты Таймуразы, районы Ныхасы æгъдæутты комитеты сæрдар Хæмыцаты Раманы, Ныхасы уæнг Туаты Зауыры. Алчидæр дзы кæстæртæн радзырдта, бæрæгбон цы нысан кæны, куыд æй бæрæг кодтой нæ фыдæлтæ, сæ цардæй æрхастой дæнцæгтæ.
Дардтæр Лæгты Зæдмæ зæрдиагæй бакуывтой хистæртæ – нæртон фынгыл æвæрд уыдысты æгъдаумæ гæсгæ æртæ кæрдзыны, æртæ фæрсджы æмæ бæгæны.
Районы Ныхасы вокалон къорд «Æрфæны фæд» чысыл концертон программæ бацæттæ кодта, æмæ йыл цинимæ сæмбæлдысты мадзалы архайджытæ. Касаты Райæ æмæ Къубалты Зинæ азарыдысты «Мæ уарзон гыцци» æмæ «Рагæй дæр хайджын», æхсæзæм скъолайы дæсæм къласы ахуырдзау Хуыбиаты Ибрагим аив бакаст Хостыхъоты Зинæйы æмдзæвгæ «Лæджы кад».
Кæронбæттæны æрбацæуджытæн бæрæгбоны фæдыл зæрдиаг арфæ ракодтой Мæрзаты Таймураз æмæ библиотекæйы кусджытæ. Уазджытæн балæвар кодтой Дауыраты Дамиры ног чиныг «Æз уын фæдзæхсын рæстдзинад».

"ВЕСТНИК БЕСЛАНА"