БЕСЛАН.РУ

Æвæццæгæн æмæ нæ мадæлон æвзаг бахъахъæныныл цас дзурæм æмæ фыссæм, уый бæрц хъуыддæгтæй куы аразиккам, уæд дзы фыссыны сæр дæр ницæмæн хъæуид. Цъиувæдис кæнæм, сæфы, сæфы, зæгъгæ, фæлæ фæдисхъæр дæр фылдæр хатт вæййы… уырыссагау. Æртын фондз – цыппор азы кæуыл цæуы, æмæ уыдонæй хистæртæ ма, чи зоны, искуыд æрдæгцъæрæмыхстытæй сæ хъуыдытæ сæ мадæлон æвзагыл бамбарын кæндзысты, фæлæ уыдонæй кæстæр фæлтæртæ бирæ дзырдтæ зонгæ дæр нæ кæнынц, сæ лексикæ у фыдмæгуыр.

Мæхи ‘мбарынхъом куы фæдæн, уæдæй нырмæ хъусын, кæрæдзийы, дам, бауарзæм, ныууадзæм нæхи ирæттæ, дыгурæттæ æмæ къуыдайрæгтыл дих кæнын. Ам дæр ис цæлхдуртæ, Æз дæр зноныггон нал дæн, фæлæ мæхи нæдæр ирон хонын, нæдæр дыгурон, фæзæгъын, уæллагкоймаг, гæлиатаг дæн, зæгъгæ. Æмæ цы, ам тыхмийæ ницы сараздзыстæм, уадз, уæм дыгурæттæ, ирæттæ, къуыдайрæгтæ, чысайнæгтæ, уæллагкоймæгтæ – не ‘ппæт дæр ирæттæ стæм, иу у не ‘взаг, нæ культурæ, иу сты нæ уидæгтæ, историйы гургъахъ фæндæгтыл иумæ рацыдыстæм. Цы хъуаг стæм, уый – иудзинад. Ацы даргъ ныхæсты фæстæ мæ фæнды æрхæссын иу дæнцæг. Ивгъуыд цыппæрæмы нæм редакцимæ æрбацыд æрыгон сылгоймаг, схонæм æй Фатимæ. Заманхъуйлаг чызг, куысы районы поликлиникæ, цæргæ та кæны Горæтгæрон районы хъæутæй иуы. Йæ лæппу цæуы уыцы хъæуы бынæттон рæвдауæндонмæ. Цæвиттон, районы уыдис æркаст «Ирон аив дзырды дæсны», æмæ хъомылгæнджытæ уынаффæ рахастой Фатимæйы лæппуйы уырдæм бацæттæ кæныныл. Радтой йын Чеджемты Георы æмдзæвгæ. Лæппу цалынмæ рæвдауæндонмæ нæ цыд, уæдмæ йæм хæдзары дзырдтой иронау, æмæ хорз арæхст йæ мадæлон æвзагыл дзурынмæ. Фæлæ йын рæвдауæндоны загътой, нæ программæ, дам, уырыссаг у, зын ын уыдзæн, æмæ, дам, æм уæхимæ дæр уырыссагау дзурут. Афтæ саби гыццылгай «суырыссаг».

Ныр ацы чысыл «уæрæседзау» хъуамæ Чеджемы-фырты æмдзæвгæ конкурсы дзырдтаид иронау, æмæ йын Фатимæ фыццаг дзырдты мидис бамбарын кодта, афтæмæй хъуыддаг æнцонæн ацыд – лæппу уацмыс тынг аив дзырдта. Фæлæ ма æркастмæ цалдæр боны куы хъуыдис, уæд хъомылгæнæг ныййарæгмæ фæдзырдта æмæ йын бамбарын кодта, рæвдауæндоны кад æндæр лæппу кæй хъахъхъæндзæн. Фатимæ æрвдзæфау фæци, стæй бафарста, цæмæ, зæгъгæ. Æмæ йын хъомылгæнæг радта диссаджы дзуапп: «У вашего мальчика ардабонский акцент». Гъе уый дын царциаты диссаг, «убойный аргумент». Гыццыл лæппуйы заманхъуйлаг ирон здæх кæйдæрты зæрдæмæ нæ фæцыд! Кæмæй йæ баивтой, уый «акцент» сæм аивдæр фæкаст.

Хъомылгæнæгæн йæ ном – йæ уæлæ. Сывæллоны зæрдæйы цы хъæдгом ныууагъта ацы æнæраст хъуыддаг, ууыл ничи ахъуыды кодта. Ныр гыцци мур йæ мадæн кæугæйæ афтæ, æз, дам, æвæццæгæн, æвзæр дæн, æмæ дам, дæу дæр ахæм лæппу нæ хъæуы. Фатимæ мын уыцы ныхæстæ загъта кæугæйæ. Ныр дыууæ къуырийы сабийы рахон-бахон кæны психологмæ, цæмæй гыццыл йæхимæ æрцæуа, уый тыххæй.

Ацы рæвдауæндоны коллектив, мæнмæ гæсгæ, рынчын у. Мадæлон æвзагыл ма дзурут уæ сабитæм хæдзары, зæгъгæ, чи уынаффæ кæны ныййарджытæн, уый æндæр цы схуындæ уа? Фатимæйæн йæ маст æгæрон у, хицауадмæ сыл бахъаст кæнын та йæ сæрмæ нæ хæссы, стæй, дам, мæгуыр адæймаджы фарс чи у, цыфæнды хицауæн дæр, дам, йæ уидæгтæ фидар сты, мæхæдæг, дам, аххосджыны бынаты баззайдзынæн. Фæлæ гыццыл лæппуйы уды хъæдгом та кæд байгас уыдзæн? Сывæллон алцыдæр йæ зæрдыл куы дары…

"Вестник Беслана"