БЕСЛАН.РУ

Нæ зынаргъ Рахизфарсы районы цæрджытæ, Хетæджы Уастырджийы хорзæх уæ уæд! Амонд æмæ фарн бахæссæд уæ алкæйы къонамæ дæр. Иннæ ацафон дæр ыл ноджы рæсугъддæр æмæ бæркадджындæрæй сæмбæлут.

Куыд зонут, афтæмæй æрбахæццæ кæны Беслæныхъæуы Уастырджийы кувæндоны бæрæгбон дæр, кæцы уыдзæн 2 августы 2015 азы.
Ирон адæймагæн йе ‘гъдау куыд амоны, уымæ гæсгæ бæрæгбоны йæ кувинæгтимæ бацæуы Дзуары бынмæ. Фæлæ скувыны размæ алчидæр хъуамæ йæхи бацæттæ кæна Дзуары размæ сыгъдæгæй æрлæууынмæ. Уый тыххæй зæрдыл бадарын хъæуы:

Дзуары бынмæ цæуынвæнд куы скæнай, уæд хъуамæ æппын къаддæр æртæ боны æвзæр дзыхæй ма дзурай, нæй æлгъитæн, сылгоймагимæ æмуд цæуæн, æнæуаг митæ ферох кæн, ирон бæгæныйæ карздæр нозт ма баназ, айк, маргъ æмæ бырынкъджыны фыдæй ма фæхъæстæ у, тамако ма бадым, дæ ныхас æмæ хъуыдытæ хъуамæ уой сыгъдæг;
- хойрагæй дæ хæдзары æрцæттæ кæн кувинæгтæ: æртæ уæливыхы, кæд кусарт акодтай, уæд физонæг (раззаг хуылфыдзаумæттæй, кæнæ æртæ-фондз-авд фæрскæй конд), ирон бæгæны, урс хæцъилы тыхт хæрзæхсад лыстæг æхцатæ мысайнагæн. Дзуары бынмæ минас æмæ цæл кæнынмæ нæ фæцæуынц, фæлæ кувынмæ, бинонты æмæ сыхбæсты бафæдзæхсынмæ;

- уæлæдарæс хъуамæ уа сыгъдæг æмæ бæрæгбонхуыз. Де ‘ртæ уæливыхы дын хистæртæ куы скувой, уæд дзы саход. Кувинæгтæй æмбæлы аходæггаг æрбахæссын хæдзармæ - бинонтæ дзы цæмæй фæхъæстæ уой. Кæд демæ исчи йæ мысайнæгтæ арвыста, уæд уымæн дæр йæ кувæггаджы хай сæмбæлын кæн;
- Дзуары бынмæ нæй хæссæн карз нозт, тамакотæ, нæй дзы хъæрæй дзурæн, æнæуаг ныхас кæнæн. Ирон кувæндæттæм нæй хæссæн чырыстон сойын цырæгътæ.


- кувæндоны ерыстæ арæзт куы ‘рцæуа, уæд дæхи иуварс ма алас, бавзар иннæтимæ дæ хъару
æмæ дæ зонд. Хъазты мидæг дæ кафынмæ куы хонæй, уæд ракаф;

- дæ фæстæ бафснайынхъом у. Нæй æвналæн мысайнæгтæ, æмæ цы мигæнæнтæй фæархайынц, уыдонмæ.

Ацы фиппаинæгтæ уæ зæрдыл бадарут!

ТОМАЙТЫ Савели, ÆÆЗ «Иры Стыр Ныхас»-ы Рахизфарсы районы хайады сæрдар.