БЕСЛАН.РУ

Ацæргæ адæймаджы бонмæ Фарныхъæуы культурæйы артдзæст æмæ библиотекæйы кусджытæ æмхъарутæй бацæттæ кодтой литературон-музыкалон композици «Гъæйт, мардзæ, нæ хистæртæ!» æмæ йæм æрбахуыдтой хъæуы хистæр нæлгоймæгтæ æмæ сылгоймæгты.

Æнæзивæгæй æрбацыдысты изæрмæ Бежаты Юри, Мамсыраты Мæйырбег, Хабæты Таймураз, Мамсыраты Соня, Дойаты Ирæ, Сасиаты Нинæ æмæ Цъæхилты Зинæ. Культурæйы хæдзары сæргълæууæг Агънаты Земфирæ уазджытæн зæрдиаг «æгасцуай» загъта, стæй сын радзырдта бæрæгбоны нысаниуæджы тыххæй. Дарддæр райдыдтой алыхуызон конкурстæ, кæцыты архайдтой хуынд адæм. Хъуамæ бавдыстаиккой сæ арæхстдзинад, картоф чи тагъддæр астъигъдзæн; нартхор рæвдздæр чи азгъалдзæн; кæхцы бон сывæллонæн мидисджындæр æмæ рæсугъддæр чи акувдзæн, афтæ – ног чындзæн дæр. Театралон равдыст зæрдæмæдзæугæ рауад – Дзантиаты Нателлæ фæндыр раст цыма дзурын скодта, ничи фæлæууыд йæ бынаты, хистæртæ рахызтысты æмæ нæртон хъазт сарæзтой. Культурæйы хæдзары аивадон къордтæ – ансамбль «Фарн» æмæ аив кæсджытæ сын барухс кодтой сæ зæрдæ сæ курдиатæй.

Уæдмæ жюрийы уæнгтæ Гагиаты Фатимæ, Биджелты Альбинæ æмæ Сугъараты Индирæ раст тæрхон рахастой æмæ сбæрæг кодтой фæуылахизуæвджыты. Кæд алыхуызон бынæттæ бацахстой уазджытæ, уæддæр дзы йæ хæдзармæ æнæ призæй ничи аздæхт – радтой сын чысыл лæвæрттæ, стæй сæ бахуыдтой рæсугъд фынгæвæрдмæ.

"Вестник Беслана"