БЕСЛАН.РУ

Мадæлон æвзаджы ахадындзинады тыххæй æнæкæрон бирæ дзурæн ис. Фæдис хъæр кæнæм, дзыназæм, фæлæ нæ йæ уавæр фæхуыздæр кæныны тыххæй стæмтæй йеддæмæ ничи ницы архайы. Нæ бон цы у, уый дæр нал аразæм – бинонты астæу нæ сабитæм дзурæм уырыссагау, хатгай цъæрæмыхстытæгæнгæ…

Фæлæ йын йæ хъысмæтыл зæрдиагæй чи тыхсы, уыдон, фыццаджыдæр, сты скъолаты ирон æвзаг æмæ литературæйы ахуыргæнджытæ. Æз мæхæдæг, цыппæрæм скъолайы æрыгон ахуыргæнæг Дыгъуызты Индирæ Хуымæллæджы сабитæн цы гом урок радта, уым куы нæ бадтаин, уæд мæ нæ бауырныдтаид, ахæм диссаджы арæхстджын æрыгон ахуыргæнджыты фæлтæр нæм кæй ис, сæ уды ‘ппæт хъарутæ дæр скъоладзаутæн чи дæтты, мадæлон æвзаг сын чи уарзын кæны, цымыдисдзинад сæм чи ‘взæрын кæны. Хæрзæрыгон, аив æдде бакастæй, рæсугъд - уды кондæй, Индирæ раст артисткæ цыма уыд æмæ ролы хъазыд, ахæм хъуыды мæм сæвзæрд.
Уыцы урочы тыххæй фыстон нæ газеты раздæры номыртæй иуы. Республикон конкурсмæ æрвыст æрцыд Дыгъуызты Индирæ районы кад бахъахъхъæныны охыл, æмæ ам дæр дзыхъхъы нæ ныллæууыд – дыккаг бынат бацахста. Гыццыл рæстæджы фæстæ йæ фæндаг адардта Кæсæг-Балхъармæ. Уым архайдта регионты ‘хсæн мадæлон æвзæгты ахуыргæнджыты цыппæрæм конкурсы ивгъуыд мæйы фæстаг бонты. Цæгат Кавказы æппæт республикæты минæвæрттæ дзы равдыстой сæ хъарутæ, сæ зонындзинæдтæ, профессионализм, æмæ та ам дæр нæ районы минæвар уыди хуыздæрты рæнхъы – бацахста дыккаг бынат. Кæй зæгъын æй хъæуы, уый стыр кад у канд нæ районæн нæ, фæлæ республикæйæн дæр. Зæрдиаг арфæ кæнæм Индирæйæн йе стыр уæлахизы фæдыл, ноджы егъаудæр æнтыстдзинæдтæ бафтæд йæ къухы йæ равзæрст зын, фæлæ рæсугъд фæндагыл.

АГЪНАТЫ А.